ശരീഅത്ത് സംരക്ഷണ സമ്മേളനം

ശരീഅത്ത് സംരക്ഷണ സമ്മേളനത്തിന് 501 അംഗ സ്വാഗതസംഘം. സമ്മേളനം നവംബര്‍ 1 വെള്ളിയാഴ്ച

കോഴിക്കോട് : മതവിശ്വാസവും വ്യക്തി നിയമവും സംരക്ഷിക്കുന്നതിന് സമസ്ത കേരള ജംഇയ്യത്തുല്‍ ഉലമയുടെ കീഴില്‍ നവംബര്‍ 1ന് വെള്ളി കോഴിക്കോട് ശംസുല്‍ ഉലമാ നഗറില്‍ നടക്കുന്ന ശരീഅത്ത് സംരക്ഷണ സമ്മേളനത്തിന് കോഴിക്കോട് ചേര്‍ന്ന സുന്നി കണ്‍വെന്‍ഷനില്‍ 501 അംഗ സ്വാഗതസംഘത്തിന് രൂപം നല്‍കി. സി കോയക്കുട്ടി മുസ്‌ലിയാര്‍ , ചെറുശ്ശേരി സൈനുദ്ധീന്‍ മുസ്‌ലിയാര്‍ , സയ്യിദ് ഹൈദറലി ശിഹാബ് തങ്ങള്‍ , പാറന്നൂര്‍ പി പി ഇബ്രാഹിം മുസ്‌ലിയാര്‍ , സയ്യിദ് മുഹമ്മദ് കോയ തങ്ങള്‍ , ചേലക്കാട് മുഹമ്മദ് മുസ്‌ലിയാര്‍ , വാവാട് കുഞ്ഞിക്കോയ മുസ്‌ലിയാര്‍ , എം സി മായിന്‍ ഹാജി, വി മോയിമോന്‍ഹാജി, ടി കെ പരീക്കുട്ടി ഹാജി (രക്ഷാധികാരികള്‍ ), കോട്ടുമല ടി എം ബാപ്പുമുസ്‌ലിയാര്‍ (ചെയര്‍മാന്‍ ), ഉമ്മര്‍ ഫൈസി മുക്കം, എ വി അബ്ദുറഹിമാന്‍ മുസ്‌ലിയാര്‍ , ആര്‍ വി കുട്ടിഹസ്സന്‍ ദാരിമി, സി എച്ച് മഹ്മൂദ് സഅദി, കെ മോയിന്‍കുട്ടി മാസ്റ്റര്‍ , മുസ്തഫ മുണ്ടുപാറ, കെ അബ്ദുല്‍ ബാരി ബാഖവി, കെ കെ ഇബ്രാഹീം മുസ്‌ലിയാര്‍ , യൂസുഫ് മുസ്‌ലിയാര്‍ കരീറ്റിപ്പമ്പ് (വൈസ് ചെയര്‍മാന്‍മാര്‍ ), നാസര്‍ ഫൈസി കൂടത്തായി (ജന. കണ്‍വീനര്‍ ), കെ സി അഹമ്മദ് കുട്ടി മൗലവി, മലയമ്മ അബൂബക്കര്‍ ഫൈസി, സലാം ഫൈസി മുക്കം, അയ്യൂബ് കൂളിമാട് (കണ്‍വീനര്‍മാര്‍ ), എഞ്ചിനിയര്‍ മാമുക്കോയ ഹാജി (ട്രഷറര്‍ )

പ്രചരണം: കെ പി കോയ (ചെയര്‍മാന്‍ ), ആര്‍ വി എ സലാം (കണ്‍വീനര്‍ ), ഫൈനാന്‍സ്:- ആര്‍ വി കുട്ടി ഹസ്സന്‍ ദാരിമി (ചെയര്‍മാന്‍ ), മാമുക്കോയ ഹാജി (കണ്‍വീനര്‍ ), സ്റ്റേജ്, ലൈറ്റ് & സൗണ്ട്: കുഞ്ഞാലന്‍കുട്ടി ഫൈസി (ചെയര്‍മാന്‍ ), ഒ പി അഷ്‌റഫ് (കണ്‍വീനര്‍ ). മീഡിയ: പി ഹസൈനാര്‍ ഫൈസി (ചെയര്‍മാന്‍ ), സി പി ഇഖ്ബാല്‍ (കണ്‍വീനര്‍ ) പ്രോഗാം: കെ മോയിന്‍കുട്ടി മാസ്റ്റര്‍ (ചെയര്‍മാന്‍ ), ടി പി സുബൈര്‍ മാസ്റ്റര്‍ (കണ്‍വീനര്‍ ), വളണ്ടിയര്‍: റഷീദ് ഫൈസി വെള്ളായിക്കോട് (ചെയര്‍മാന്‍ ), യഹ്‌യ വെള്ളയില്‍ (കണ്‍വീനര്‍ ) എന്നിവരെ തെരഞ്ഞെടുത്തു. പ്രചരണഭാഗമായി ഒക്. 25ന് വെള്ളിയാഴ്ച പള്ളികളില്‍ ബോധവല്‍ക്കരണം, ഒക്‌ടോ: 29, 30ന് സന്ദേശയാത്ര, 20ന് ജില്ലാതല കണ്‍വെന്‍ഷനുകള്‍ 23ന് മണ്ഡലം കണ്‍വെന്‍ഷനുകള്‍ നടത്താന്‍ തീരുമാനിച്ചു. യോഗത്തില്‍ സയ്യിദ് മുഹമ്മദ് കോയതങ്ങള്‍ ജമലുല്ലൈലി അധ്യക്ഷത വഹിച്ചു. ടി എം ബാപ്പു മുസ്‌ലിയാര്‍ ഉദ്ഘാടനം ചെയ്തു. കെ. മോയിന്‍കുട്ടി മാസ്റ്റര്‍ പ്രൊജക്ട് അവതരിപ്പിച്ചു. ആര്‍ വി കുട്ടി ഹസ്സന്‍ ദാരിമി, യുസുഫ് മുസ്‌ലിയാര്‍ , സി എച്ച് മഹ്മൂദ് സഅദി, മലയമ്മ അബൂബക്കര്‍ ഫൈസി, കെ സി അഹമ്മദ് കുട്ടി മൗലവി, സലാം ഫൈസി മുക്കം, കെ പി കോയ, അഷ്‌റഫ് ബാഖവി ചാലിയം, കെ എന്‍ എസ് മൗലവി, റശീദ് ഫൈസി വെള്ളായിക്കോട്, മജീദ് ദാരിമി ചളിക്കോട്, കെ കെ ഇബ്രാഹീം മുസ്‌ലിയാര്‍ , അബ്ദുറഹിമാന്‍ മാസ്റ്റര്‍ കരീറ്റിപ്പറമ്പ്, മുഹമ്മദ് ഇബ്രാഹിം, ടി പി സുബൈര്‍ മാസ്റ്റര്‍ പ്രസംഗിച്ചു. നാസര്‍ ഫൈസി കൂടത്തായി സ്വാഗതവും പി ഹസൈനാര്‍ ഫൈസി നന്ദിയും പറഞ്ഞു.

- SKSSF STATE COMMITTEE

അന്ധയായ സുഡാനി തീര്‍ത്ഥാടകക്ക് മദീനയില്‍ വെച്ച് കാഴ്ച തിരിച്ചുകിട്ടി

October 15, 2013 5:30 pm

ഏഴു വര്‍ഷമായി കാഴ്ച ശേഷി നഷ്ടപ്പെട്ട സുഡാനി തീര്‍ത്ഥാടകക്ക് മദീനയിലെ പ്രവാചക പള്ളിയില്‍ വെച്ച് കാഴ്ച ശേഷി തിരിച്ചുകിട്ടി. സുഡാനില്‍ നിന്ന് ഹജ്ജിനെത്തിയ ഫാത്തിമ അല്‍മാഹിയാണ് തന്‍റെ നഷ്ടപ്പെട്ട കാഴ്ച മദീനാ പള്ളിയിലെ പ്രാര്‍ത്ഥനക്കു ശേഷം തിരിച്ചുകിട്ടിയതായി വ്യക്തമാക്കിയത്. സൌദി പത്രമായ ഉക്കാസ്, എമിറേറ്റ് 24/7 എന്നിവ സംഭവം റിപ്പോര്‍ട്ട് ചെയ്തു.

പ്രാര്‍ത്ഥന നടത്തിക്കൊണ്ടിരിക്കെ പള്ളിയില്‍ നിന്നും തന്‍റെ കണ്ണുകളിലേക്ക് പ്രകാശം പതിക്കുകയും ഏഴു വര്‍ഷത്തിനു ശേഷം ആദ്യമായി തന്‍റെ മകനെ ദര്‍ശിക്കുകയും ചെയ്തതായി ഫാത്തിമ പറയുന്നു. ഇപ്പോള്‍ ആരുടെയും സഹായമില്ലാതെ എനിക്ക് നടക്കാനും കഴിയുന്നുണ്ട്. അവര്‍ പറഞ്ഞു.

ഏഴു വര്‍ഷം മുമ്പ് കാഴ്ച നഷ്ടപ്പെട്ടതു മുതല്‍ ഒരുപാട് ചികിത്സകള്‍ നടത്തിയെങ്കിലും അതൊന്നും ഫലിക്കാതെ വരുകയായിരുന്നു. അന്നു മുതല്‍ മനസ്സില്‍ സൂക്ഷിച്ച ആഗ്രഹമാണ് ഹജ്ജ് യാത്ര. മക്കയും മദീനയും സന്ദര്‍ശിച്ചാല്‍ തന്‍റെ കാഴ്ച തിരിച്ചുകിട്ടുമെന്ന് അവര്‍ വിശ്വസിച്ചു. കാഴ്ചശേഷിക്കു വേണ്ടി പ്രാര്‍ത്ഥിച്ചു കൊണ്ട് അവര്‍ ദിവസങ്ങളോളം പ്രവാചക പള്ളിയില്‍ താമസിച്ചിരുന്നു.

അല്ലാഹു എന്നത് മുസ്ലിം വിശ്വാസത്തിന്റെ ഭാഗമെന്ന് മലേഷ്യന്‍ കോടതി

October 15, 2013 1:05 pm

ക്വാലാലംപൂര്‍: ദൈവത്തെ പരാമര്‍ശിക്കുമ്പോള്‍ അല്ലാഹു എന്നുച്ചരിക്കാന്‍ ഇസ്ലാം മത വിശ്വാസികള്‍ക്കു മാത്രമേ അവകാശമുള്ളൂവെന്ന് മലേഷ്യന്‍ കോടതി.  കത്തോലിക്ക പ്രസിദ്ധീകരണത്തില്‍ ദൈവത്തെ അടയാളപ്പെടുത്താന്‍ അല്ലാഹു എന്ന് പ്രസിദ്ധീകരിച്ചതിനെതിരെ മലേഷ്യന്‍ സര്‍ക്കാര്‍ കൈക്കൊണ്ട നടപടിയെ ശരിവെച്ചുകൊണ്ടാണ് കോടതിയുടെ സുപ്രധാന വിധി.

മലേഷ്യയിലെ ഹെറാള്‍ഡ് എന്ന ക്രിസ്ത്യന്‍ പത്രത്തിന്‍റെ മലയ പരിഭാഷയില്‍ ദൈവത്തെ അല്ലാഹു എന്ന് വിശേഷിപ്പിക്കുന്നതിനെതിരെ 2009ല്‍ സര്‍ക്കാര്‍ രംഗത്തുവന്നതാണ് തര്‍ക്കങ്ങളുടെ തുടക്കം. അല്ലാഹു എന്ന് ഉപയോഗിക്കുന്നത് നിര്‍ത്തിയില്ലെങ്കില്‍ പത്രത്തിന്റെ ലൈസന്‍സ് പിന്‍വലിക്കുമെന്ന ആഭ്യന്തര മന്ത്രാലയ നിലപാടിനെതിരെ പത്രം കോടതിയെ സമീപിച്ചു. 1963ല്‍ ആധുനിക മലേഷ്യ രൂപവത്കരിക്കുന്നതിനു മുമ്പുതന്നെ ക്രിസ്ത്യാനികള്‍ അല്ലാഹു എന്ന് ഉപയോഗിച്ചുവരുന്നുണ്ടെന്നും ബൈബിളിന്‍െറ മലയ പതിപ്പില്‍ ദൈവത്തെ അല്ലാഹു എന്നാണ് വിശേഷിപ്പിക്കുന്നതെന്നും കത്തോലിക്ക സഭ കോടതിയില്‍ ബോധിപ്പിച്ചു. ഈ വാദം അംഗീകരിച്ച കോടതി സര്‍ക്കാര്‍ വിലക്ക് പിന്‍വലിക്കാന്‍ ആവശ്യപ്പെട്ടു. തുടര്‍ന്ന്, വിലക്ക് പിന്‍വലിച്ചത് രാജ്യവ്യാപക കലാപത്തിന് വഴിവെച്ചിരുന്നു.

മതസ്ഥാപനങ്ങള്‍ക്കുനേരെ നടന്ന അക്രമണങ്ങളുള്‍പ്പെടെ ദൂരവ്യാപകമായ സാമുദായിക സംഘര്‍ഷത്തിന് വഴിവെച്ച കീഴ്കോടതി വിധിക്കെതിരെ സര്‍ക്കാര്‍ നല്‍കിയ അപ്പീലിലാണ് പുതിയ വിധി വന്നിരിക്കുന്നത്. മുസ്ലിം ഭൂരിപക്ഷ രാജ്യമായ മലേഷ്യയില്‍ ഒമ്പത് ശതമാനം ജനങ്ങള്‍ ക്രിസ്ത്യാനികളാണ്.

സമസ്ത ശരീഅത്ത് സംരക്ഷണ സമ്മേളനം നവംബര്‍ 1 ന്

ഒക്ടോബര്‍ 25 വെള്ളിയാഴ്ച പള്ളികളില്‍ ബോധവല്‍ക്കരണ പ്രസംഗങ്ങള്‍ നടക്കും

കോഴിക്കോട് : രാജ്യത്തെ ഭരണഘടനയുടെ മൌലിക അവകാശങ്ങളില്‍ പെട്ട മതവിശ്വാസവും വ്യക്തിനിയമവും സംരക്ഷിക്കുന്നതിന് സമൂഹത്തില്‍ ബോധവല്‍ക്കരണം നടത്താനും ഏക സിവില്‍കോഡ് വാദികളുടെ പുതിയ കുടില തന്ത്രങ്ങളെ തിരിച്ചറിഞ്ഞ് പ്രതികരിക്കാനുമായി സമസ്ത കേരള ജംയ്യത്തുല്‍ ഉലമാ ശരീഅത്ത് സംരക്ഷണ സമ്മേളനം നവംബര്‍ 1 വെള്ളിയാഴ്ച കോഴിക്കോട് നടത്താന്‍ സമസ്തയുടെയും കീഴ്ഘടകങ്ങലുടെയും സംയുക്ത യോഗം തീരുമാനിച്ചു.

കുടുംബ പ്രശ്നങ്ങളാലും സാമൂഹ്യ ബാധ്യതയാലും നടക്കുന്ന ചില വിവാഹങ്ങളില്‍ പ്രയപൂര്‍ത്തിയായില്ല എന്ന തടസ്സം ഉന്നയിച്ച് വിവാഹം തടയാനും ശൈശവ വിവാഹ നിരോധന പരിതിയില്‍ പെടുത്തി സിവില്‍ നിയമത്തെ അട്ടിമറിക്കാനുമുള്ള സമീപകാലത്തെ ചില കേന്ദ്രങ്ങളുടെ ശ്രമത്തിനെതിരെ നിയമ നടപടികളുമായി മുന്നോട്ടു പോകാനുള്ള മത സംഘടനകളുടെ തീരുമാനത്തെ കടുത്ത ഭാഷണയിലാണ് ചില മത വിരുദ്ധരും അല്‍പ ജ്ഞാനികളും വിമര്‍ശിക്കുന്നത്. മുമ്പും ഇത്തരം ശരീഅത്ത് വിരോധം പ്രകടിപ്പിച്ചപ്പോള്‍ ശരീഅത്ത് സംരക്ഷിക്കാനായി സമസ്ത നടത്തിയ സമ്മേളനങ്ങളുടെ തുടര്‍ച്ചയായാണ് നവംബര്‍ 1 ന് നടത്തുന്നത്. ഒക്ടോബര്‍25 വെള്ളിയാഴ്ച പള്ളികളില്‍ ബോധവല്‍ക്കരണ പ്രസംഗങ്ങള്‍ നടക്കും. ജില്ലാ തലങ്ങളില്‍ സ്പെഷല്‍ കണ്‍വെന്‍ഷനുകള്‍ ചേരും യോഗത്തില്‍ പണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷത വഹിച്ചു. കോട്ടുമല ടി.എം. ബാപ്പു മുസ്‍ലിയാര്‍ ഉദ്ഘാടനം ചെയ്തു. പ്രൊഫ. കെ. ആലിക്കുട്ടി മുസ്‍ലിയാര്‍ , സി.കെ.എം.സ്വാദിഖ് മുസ്‍ല്യാര്‍ , ഡോ. ബഹാഉദ്ദീന്‍ നദ്‍വി, ഉമര്‍ ഫൈസി മുക്കം, എ.വി.അബ്ദുറഹ്‍മാന്‍ മുസ്‍ലിയാര്‍ , അബ്ദുല്‍ ഹമീദ് ഫൈസി അമ്പലക്കടവ്, നാസര്‍ ഫൈസി കൂടത്തായി, ഓണമ്പിള്ളി മുഹമ്മദ് ഫൈസി, കെ.എ. റഹ്‍മാന്‍ ഫൈസി, അശ്റഫ് ഫൈസി കണ്ണാടിപ്പറമ്പ്, കെ. മോയിന്‍ കുട്ടി മാസ്റ്റര്‍ , പുത്തനഴി മൊയ്തീന്‍ കുട്ടി ഫൈസി, ഡോ. എന്‍ . എ.എം. അബ്ദുല്‍ ഖാദര്‍ , കൊടക് അബ്ദുറഹ്‍മാന്‍ മുസ്‍ലിയാര്‍ ,എ.എം. മുഹ്‍യദ്ദീന്‍ മുസ്‍ലിയാര്‍ , എം.എ. ചേളാരി, സലീം എടക്കര പ്രസംഗിച്ചു.

അറഫാസംഗമം

Monday, October 14, 2013

അറഫാസംഗമം ഇന്ന്‌;ഒത്തു ചേരുന്നത് തീര്‍ത്ഥാടക സഹസ്രങ്ങള്‍

അറഫാസംഗമത്തിൽ നിന്ന് 

വിശുദ്ധ ഹജ്ജ് കര്‍മത്തിലെ സുപ്രധാന അനുഷ്ഠാനമായ അറഫ സംഗമത്തിന് കാലം സാക്ഷ്യംനില്‍ക്കുന്ന ദിവസമാണിന്ന്. മുഴുവന്‍ ഹജ്ജ് തീര്‍ഥാടകരും മക്കയുടെ തെക്കുകിഴക്കായി ഉദ്ദേശം 22 കി.മീ. അകലെ സ്ഥിതിചെയ്യുന്ന അറഫ എന്ന സ്ഥലത്ത് സമ്മേളിക്കുന്നതാണീ കര്‍മം. ഇന്നലെമുതല്‍ പ്രാര്‍ഥനാനിര്‍ഭരരായി മിനായിലെ തമ്പുകളില്‍ കഴിയുന്ന അവര്‍ ഇന്ന് പുലര്‍ച്ചെയോടെയാണ് അറഫയിലേക്ക് പ്രയാണം ആരംഭിക്കുന്നത്. സൂര്യവെയില്‍ നട്ടുച്ചക്ക് കനക്കുമ്പോഴാണ് അറഫയിലെ ആരാധനകള്‍ക്കും ചൂടുപിടിക്കുന്നത്. ഒരു മരതണല്‍പോലും പണ്ടില്ലാതിരുന്ന മരുകാട്ടില്‍ എന്താണിങ്ങനെ ജനം വെയിലില്‍ നിന്ന് പ്രാര്‍ഥിക്കുന്നത്? അതേപ്പറ്റി പ്രമുഖ ഇറാനിയന്‍ ദാര്‍ശനികനായ അലി ശരീഅത്തിതന്നെ നിരീക്ഷിക്കുന്നു: ചരിത്രത്തില്‍ മനുഷ്യര്‍ പലരും ചെയ്തതുപോലെ സൂര്യവെളിച്ചത്തില്‍നിന്ന്, സ്വാതന്ത്ര്യത്തില്‍നിന്ന്, ജനക്കൂട്ടത്തില്‍നിന്ന് ആരും ഓടിപ്പോകരുത്. 

എപ്പോഴും ജനങ്ങളുടെ കൂടെ നില്‍ക്കുക -അതാണ് അറഫ ഉദ്ബോധിപ്പിക്കുന്നത്.

ജ്ഞാനം, തിരിച്ചറിവ് എന്നിവയാണ് അറഫ എന്ന അറബി പദത്തിന്‍െറ അര്‍ഥങ്ങളില്‍ പ്രധാനം. ഹാജിമാര്‍ ജീവിത യാഥാര്‍ഥ്യം തിരിച്ചറിഞ്ഞ് അത് തിരിച്ചുപിടിക്കുന്ന സ്ഥലമാണ് അറഫ. ഭൗതിക ഭ്രമത്തരായാണ് മനുഷ്യര്‍ എന്നും ജീവിക്കുന്നത്. ജീവിതത്തില്‍ പരമാവധി സുഖിക്കുക, ആനന്ദത്തിലാറാടുക എന്ന ലക്ഷ്യമേ അവര്‍ക്കുള്ളൂ.

അതിനപ്പുറം ജീവിതം മറ്റൊന്നുമല്ലാത്തവരാണ് ഏറെ. സുഖലോലുപരാകാന്‍ സമ്പത്ത്, അധികാരം, സ്ഥാനമാനങ്ങള്‍ എന്നിവ വേണം. അവ നേടിയെടുക്കാന്‍ കൈയൂക്കുള്ളവന്‍, ഇല്ലാത്തവനെ കീഴൊതുക്കിയും ചവിട്ടിയരച്ചുമാണ് ലോകം മുമ്പോട്ട് കുതിക്കുന്നത്. ഈയൊരവസ്ഥയില്‍ ആരാണ് മനുഷ്യന്‍, തന്‍െറ ജീവിതലക്ഷ്യമെന്ത്, എവിടെ നിന്നാണ് ജീവിതയാത്ര തുടങ്ങിയത്, എവിടെയാണത് അവസാനിക്കുക എന്ന തിരിച്ചറിവാണ് അറഫയിലെ ജനസഞ്ചയം ഏറ്റുവാങ്ങുന്നത്. ദൈവത്തില്‍നിന്ന് വന്ന് ദൈവത്തിലേക്ക് തന്നെ മടങ്ങിപ്പോവുന്നതിനിടയിലെ ഒരു ഇടത്താവളം മാത്രമാണ് ജീവിതം. അഥവാ ഭൗതിക ജീവിതം നശ്വരമാണ്; അനശ്വരജീവിതം പരലോകത്തേതാണ്. മരണമെന്ന അലംഘനീയ യാഥാര്‍ഥ്യത്തോടെ ഭൗതിക ജീവിതത്തിന് തിരശ്ശീല വീഴുന്നു. അതിനാല്‍ ചുരുങ്ങിയ കാലത്തെ തന്‍െറ ജീവിതത്തിനിടയില്‍ ദൈവത്തോടും മനുഷ്യരോടുമുള്ള കടപ്പാടുകള്‍ തിരിച്ചറിഞ്ഞുവേണം ജീവിതയാത്ര തുടരാനെന്ന പാഠമാണ് അറഫ നല്‍കുന്നത്. ഹജ്ജിലെ മുഴുവന്‍ കര്‍മവും വിശ്വാസിയെ ജീവിതനശ്വരത ഓര്‍മപ്പെടുത്തുന്നുണ്ട്. മരണശേഷം പുതപ്പിക്കുന്ന കഫന്‍പുടവയിലെ രണ്ട് വെള്ളത്തുണി കഷണങ്ങളാണ് അവന്‍ സ്വയമെടുത്ത് ഇഹ്റാം തുണിയായി ഹജ്ജില്‍ ശരീരത്തില്‍ ചുറ്റുന്നത്. ഹജ്ജ് കര്‍മങ്ങള്‍ക്കിടയില്‍ മിനായിലെ തമ്പിലാണ് കൂടുതല്‍ നാള്‍ തീര്‍ഥാടകര്‍ പാര്‍ക്കുന്നത്. പരിമിത സൗകര്യമേ ആ തമ്പുകള്‍ക്കകത്തുള്ളൂ. നിലത്താണ് കിടപ്പ്. ചരിഞ്ഞോ മറിഞ്ഞോ കിടക്കാന്‍ തോന്നിയാല്‍ കൈയും കാലും മറ്റു തീര്‍ഥാടകരുടെ മേല്‍ തട്ടുമാറ് ഓരോരുത്തര്‍ക്കും നിശ്ചയിക്കപ്പെട്ട ഇടം തുലോം ചെറുത്. അഥവാ മിനായിലെ ഇടുങ്ങിയ ‘ഖബറി’ല്‍ കിടന്ന്, വരാനുള്ള ജീവിതത്തെ കൂടി പരിശീലിക്കുകയാണ് ഹാജിമാര്‍.

ദുല്‍ഹജ്ജ് എട്ടിന് മിനായില്‍ കിടന്ന് ഇന്ന് (ദുല്‍ഹജ്ജ്-ഒമ്പത്) ദൈവത്തിന്‍െറ വിചാരണക്കുവേണ്ടി മഹ്ശറാ (പരലോകത്തെ സംഗമസ്ഥാനം) മൈതാനിയിലേക്ക് പോകുന്നതുപോലെയാണ് അറഫാ മൈതാനിയില്‍ എത്തിയുള്ള സംഗമം. കഫന്‍പുടവ, ഇടുങ്ങിയ സ്ഥലത്തെ കിടത്തം, മൈതാനത്തെ ഒത്തുചേരല്‍ എന്നിവ മൂന്നും ചേര്‍ന്ന് തീര്‍ഥാടകനെ ജീവിതയാഥാര്‍ഥ്യം പഠിപ്പിക്കുകയാണ്. മതിമറന്ന ഭൗതികതയല്ല, ലക്ഷ്യബോധത്തോടെയുള്ള ഇഹലോകജീവിതമാണ് ആവശ്യമെന്ന് മനസ്സിലാക്കാന്‍ ഇതിനേക്കാള്‍ ഗൗരവതരമായ മറ്റേത് അനുഷ്ഠാനമാണ് മനുഷ്യര്‍ക്കുള്ളത്? നശ്വരമായ ഭൗതിക ജീവിതത്തില്‍ മനുഷ്യന്‍ കരസ്ഥമാക്കേണ്ടത് ദൈവിക തൃപ്തിയാണ്. ആ വലിയ പാഠം ഏറ്റവുമധികം തിരിച്ചറിഞ്ഞവര്‍ മാനവതക്ക് വഴികാട്ടി, മുന്നില്‍നടന്ന പ്രവാചകന്മാരാണ്. അവരിലെ കുലപതിയാണ് ഇബ്റാഹീം. എല്ലാ പ്രമുഖ മതസ്ഥരും ആദരിക്കുകയും തങ്ങളുടെ നേതാവായി അംഗീകരിക്കുകയും ചെയ്യുന്ന പ്രവാചകനാണ് ഇബ്റാഹീം. തന്‍െറ ജീവിതയാത്രയില്‍ മക്ക മണലാരണ്യത്തിലെത്തി ദൈവിക കല്‍പനപ്രകാരം കഅ്ബാ മന്ദിരം ആ മഹാനുഭാവന്‍ പണിതുയര്‍ത്തി. കഅ്ബയിലേക്ക് ദൈവിക കല്‍പനപ്രകാരം ജനത്തെ ഹജ്ജിന് ക്ഷണിച്ചതും ഇബ്റാഹീം തന്നെ. ആ പ്രവാചകന്‍െറയും കുടുംബത്തിന്‍െറയും ത്യാഗനിര്‍ഭരവും സമര്‍പ്പണ സന്നദ്ധവുമായ ജീവിതം മാനവരാശിക്ക് മഹനീയ മാതൃകയാണ്. അവ വിശുദ്ധ ഖുര്‍ആനില്‍ സവിസ്തരം ഇതള്‍വിരിഞ്ഞിട്ടുണ്ട്. മാനവികതയുടെ പ്രോദ്ഘാടകനും മനുഷ്യസംസ്കാരത്തിന്‍െറ രാജശില്‍പിയുമായ ഇബ്റാഹീം, മക്ക കേന്ദ്രമാക്കി മൂന്ന് സുപ്രധാന പ്രാര്‍ഥനകള്‍ ദൈവത്തോട് നടത്തിയിട്ടുണ്ട്. ഒന്ന്, എന്‍െറ തലമുറയെ മക്കയില്‍ നിന്‍െറ മന്ദിരത്തിനരികെ ഞാന്‍ താമസിപ്പിച്ചത് നിനക്ക് മാത്രം വഴിപ്പെട്ട് അവര്‍ ജീവിക്കാനാണ്. അക്കാരണത്താല്‍ നാഥാ, ജനശ്രദ്ധ നീ അവരിലേക്ക് തിരിക്കണം. 

രണ്ട്, അവര്‍ക്ക് നീ ഭക്ഷണവിഭവങ്ങള്‍ നല്‍കുക. മൂന്ന്, ഈ നാടിനെ സമാധാനവും ശാന്തിയും കളിയാടുന്ന മണ്ണാക്കി എന്നെന്നും നിലനിര്‍ത്തുക. ഏകദൈവ വിശ്വാസത്തോടൊപ്പംതന്നെ ഭൗതികതയുടെ അടിസ്ഥാനാവശ്യങ്ങളായ അന്നവും സമാധാനവും കൂടിയാണ് മാനവികതക്ക് പുലരേണ്ടതെന്നാണ് ഇസ്ലാമിക ദര്‍ശനം ആഗ്രഹിക്കുന്നതെന്ന് ഈ പ്രാര്‍ഥന വ്യക്തമാക്കുന്നു. ദൈവമാര്‍ഗത്തില്‍ സര്‍വം സമര്‍പ്പിച്ച ഇബ്റാഹീം, വാര്‍ധക്യത്തില്‍ ലഭിച്ച ഇസ്മാഈല്‍ എന്ന സന്താനത്തെ പോലും സ്വപ്നദര്‍ശനത്തെതുടര്‍ന്ന് ബലിയര്‍പ്പിക്കാന്‍ സന്നദ്ധമായി. ജീവിതത്തില്‍ ഏറ്റവും പ്രിയപ്പെട്ടതിനെ ജന്മംതന്ന നാഥനുതന്നെ സമര്‍പ്പിക്കാന്‍ സര്‍വാത്മനാ സജ്ജമാകുന്ന വിധേയത്വം. ദൈവത്തിനാകട്ടെ ആ പൈതലിന്‍െറ ഇളംചോരയായിരുന്നില്ല, ഇബ്റാഹീമിന്‍െറ സന്നദ്ധതാ പരീക്ഷണമായിരുന്നു ഉദ്ദേശ്യം. തീര്‍ഥാടകര്‍ ഹജ്ജില്‍ തങ്ങുന്ന മിനായിലായിരുന്നു ഇബ്റാഹീം പുത്രബലിക്ക് സന്നദ്ധമായത്. അതിനെ സ്മരിച്ചാണ് ബലികര്‍മം ഹജ്ജ് അനുഷ്ഠാനമായും ഹജ്ജിന് പോവാത്തവര്‍ നാട്ടില്‍ ചെയ്യേണ്ട കര്‍മമായും നിലനിര്‍ത്തിയിരിക്കുന്നത്. വിലപ്പെട്ടതെന്തും ദൈവത്തിന് സമര്‍പ്പിക്കാമെന്ന പ്രതിജ്ഞകൂടിയാണ് ഹാജിമാര്‍ അറഫയില്‍ മുഴക്കുന്നത്. പുത്രബലിക്കു സന്നദ്ധനായ ഇബ്റാഹീമിനെ അതില്‍നിന്ന് പിന്തിരിപ്പിക്കാന്‍ ചെകുത്താന്‍ വന്നു. പക്ഷേ, ചെകുത്താന്‍െറ ദുഷ്ചിന്തകള്‍ക്ക് വശംവദനാകാതെ പിശാചിനെ ഇബ്റാഹീം എറിഞ്ഞോടിച്ചുവെന്നാണ് ചരിത്രം. മനുഷ്യജീവിതത്തില്‍ കടന്നുവരുന്ന എല്ലാതരം പൈശാചികതകളെയുമാണ് ഹജ്ജില്‍ കല്ലേറ് കര്‍മം നടത്തുന്നതിലൂടെ തീര്‍ഥാടകര്‍ എറിഞ്ഞോടിക്കുന്നത്. ചുരുക്കത്തില്‍ ജീവിതത്തിന്‍െറ പൈശാചികതകളില്‍പെടാതെ സര്‍വം ദൈവത്തിനര്‍പ്പിച്ച് ഭൗതികജീവിതത്തെ മുന്നോട്ടു കൊണ്ടുപോകണമെന്നാണ് ഹജ്ജ് കര്‍മത്തിലൂടെ ഇബ്റാഹീം ലോകത്തെ പഠിപ്പിച്ചത്.

ചരിത്രത്തിന്‍െറ പ്രയാണത്തില്‍ അറഫ നല്‍കുന്ന ഇത്തരം തിരിച്ചറിവുകളെ മനുഷ്യ നാഗരികതയില്‍ വീണ്ടും ഉയര്‍ത്തി നാട്ടുകയാണ് മുഹമ്മദ് നബിയും ഹജ്ജ് നിര്‍വഹണത്തിലൂടെ ചെയ്തത്. ഒരു ലക്ഷത്തിലധികം വരുന്ന അനുയായികള്‍ക്കൊപ്പം ഹജ്ജ് നിര്‍വഹിച്ച പ്രവാചകന്‍, അറഫയിലും മിനായിലും നടത്തിയ പ്രഭാഷണങ്ങള്‍ ഈ തിരിച്ചറിവുകളെയാണ് അടയാളപ്പെടുത്തുന്നത്. ഹജ്ജ്, അതിന്‍െറ സകലവിധ ആത്മീയ ഭാവങ്ങള്‍ക്കുമൊപ്പംതന്നെ മനുഷ്യാവകാശ പ്രഖ്യാപനത്തിന്‍െറ വിളംബരഭൂമി കൂടിയായി മാറുകയായിരുന്നു നബിയുടെ അറഫാ പ്രഭാഷണത്തില്‍: മനുഷ്യരുടെ ജീവന്‍, സമ്പത്ത്, അഭിമാനം എന്നിവ ഈ ദിവസംപോലെ, ഈമാസംപോലെ, ഈ സ്ഥലം പോലെ പവിത്രമാണ്. അതിനുമീതെ ആരും അന്യായമായി കൈവെക്കരുത്. പലിശ, കുടിപ്പക ഉള്‍പ്പെടെ എല്ലാ അനിസ്ലാമികതകളും മാനവരാശിയില്‍നിന്ന് ഞാന്‍ എന്നെന്നേക്കുമായി നിര്‍ത്തല്‍ചെയ്തിരിക്കുന്നു. സ്ത്രീകളോട് മാന്യമായിവേണം പെരുമാറാന്‍. ഒരാള്‍ക്ക്, അപരന്‍ തൃപ്തിപ്പെട്ട് നല്‍കാത്തതൊന്നും നിങ്ങള്‍ മറ്റുള്ളവരില്‍നിന്ന് കവര്‍ന്നെടുത്ത് അനുഭവിക്കരുത്. അറബിക്ക് അനറബിയേക്കാള്‍, വെളുത്തവന് കറുത്തവനേക്കാള്‍, ദൈവഭയം കൊണ്ടല്ലാതെ ഒരു മേന്മയുമില്ല. പൈശാചികതക്കടിപ്പെട്ട് പരസ്പരം കഴുത്തറക്കുന്നതിനുപകരം നിങ്ങള്‍ ഏകോദര സഹോദരങ്ങളാവുക തുടങ്ങി അന്തസ്സോടെ ജീവിക്കാനും അഭിമാനം കാത്തുസംരക്ഷിക്കാനുമുള്ള വിളംബരമായി ആ പ്രഭാഷണം. ഇവ ഓരോ വര്‍ഷവും കണ്ണിലും കാതിലും ഹൃത്തിലും ആവാഹിച്ചെടുത്ത് ജീവിക്കുന്നവരാകുകയെന്ന പാഠവും അറഫ ഏവരെയും ഓര്‍മപ്പെടുത്തുന്നുണ്ട്. നിങ്ങള്‍ക്ക് ഞാന്‍ കൈമാറിയിരിക്കുന്ന സന്ദേശം ലോകാവസാനം വരേക്കുമുള്ളവര്‍ക്ക് കൈമാറണമെന്നും പ്രതിസന്ധികളിലും പ്രയാസങ്ങളിലും ജീവിതനൗക ആടിയുലയാതിരിക്കാനുള്ള ഏകപരിഹാരം ദിവ്യഗ്രന്ഥമായ ഖുര്‍ആനിനെയും എന്‍െറ ജീവിതമാതൃകയെയും മുറുകെ പിടിക്കുകയെന്നതാണെന്നും പ്രവാചകന്‍ അറഫയില്‍വെച്ച് ഉദ്ബോധിപ്പിച്ചു.

ഭൂതലത്തില്‍ ഏറ്റവും കൂടുതല്‍ ജനം ഓരോ വര്‍ഷവും സംഗമിക്കുന്ന ഇടം ഒന്നു മാത്രമേയുള്ളൂ -അറഫ. ലാളിത്യം, സാഹോദര്യം, അച്ചടക്കം, ദൈവിക വിധേയത്വം എന്നിവ കാഴ്ചവെക്കുന്ന അനിര്‍വചനീയ സന്ദര്‍ഭം കൂടിയാണത്. അമേരിക്കയിലെ നീഗ്രോ മുസ്ലിം നേതാവും പ്രമുഖ പൗരാവകാശ പ്രവര്‍ത്തകനുമായിരുന്ന മാല്‍ക്കം എക്സ് തന്‍െറ ആത്മകഥയില്‍ ഹജ്ജിലെ ഈ അനുഭവങ്ങള്‍ വിവരിക്കുന്നുണ്ട്. ഇബ്റാഹീമിന്‍െറയും മുഹമ്മദിന്‍െറയും, പരിശുദ്ധ വേദപുസ്തകത്തിലെ മറ്റ് പ്രവാചകന്മാരുടെയും ജന്മഗേഹമായ ഈ പുരാതന വിശുദ്ധഭൂമിയില്‍ വിവിധ വര്‍ണക്കാരും വംശക്കാരുമായ ആളുകള്‍ പുലര്‍ത്തിയതിനു തുല്യമായ സാഹോദര്യ മനോഭാവത്തിനും ആതിഥ്യമര്യാദക്കും മുമ്പൊരിക്കലും ഞാന്‍ സാക്ഷിയായിട്ടില്ല. ലോകത്തിന്‍െറ വിവിധ ഭാഗങ്ങളില്‍നിന്ന് പതിനായിരക്കണക്കിന് തീര്‍ഥാടകര്‍ അവിടെ എത്തിച്ചേര്‍ന്നിരുന്നു. നീലക്കണ്ണും സ്വര്‍ണത്തലമുടിയുമുള്ളവര്‍ തൊട്ട് കറുത്തതൊലിയുള്ള ആഫ്രിക്കക്കാര്‍ വരെ വ്യത്യസ്ത നിറക്കാര്‍. പക്ഷേ, ഞങ്ങളെല്ലാവരും ഒരേ അനുഷ്ഠാനങ്ങളിലാണ് പങ്കെടുത്തത്. ഏകതയുടെയും സാഹോദര്യത്തിന്‍െറയും ചൈതന്യം പ്രകടമാക്കുന്നവയായിരുന്നു ഈ അനുഷ്ഠാനങ്ങള്‍. (മാല്‍കം എക്സിന്‍െറ ആത്മകഥ; പേ: 438, 439 ഐ.പി.എച്ച്; കോഴിക്കോട് 12)

ഇന്ന് മധ്യാഹ്നം മുതല്‍ സൂര്യാസ്തമയം വരെയാണ് ഹാജിമാര്‍ അറഫയില്‍ പ്രാര്‍ഥനയില്‍ കഴിയുക. ഉച്ചക്ക് അവിടത്തെ മസ്ജിദ് നമിറയില്‍നിന്ന് നടത്തപ്പെടുന്ന പ്രഭാഷണത്തിന് അവരും ലോകത്തോടൊപ്പം കാതോര്‍ക്കും. ലോകജനതയെ പൊതുവിലും മുസ്ലിം ലോകത്തെ വിശേഷിച്ചും അഭിസംബോധന ചെയ്യുന്നതാണ് ഈ പ്രഭാഷണത്തിന്‍െറ ഉള്ളടക്കം. അറഫാ ദിനത്തിന്‍െറ പ്രാധാന്യത്തെപ്പറ്റി മുഹമ്മദ് നബി പറഞ്ഞു: ‘അല്ലാഹുവിങ്കല്‍ അറഫാ ദിവസത്തേക്കാള്‍ ശ്രേഷ്ഠമായ ഒരു ദിവസമില്ല. അന്ന് അല്ലാഹു ഭൂമിയോട് ഏറ്റവും അടുത്തുവരും. എന്നിട്ട്, ആകാശവാസികളോട് ഭൂവാസികളെക്കുറിച്ച് അഭിമാനത്തോടെ പറയും-എന്‍െറ അടിമകളെ നോക്കൂ! ജടപിടിച്ചവരും പൊടിപറ്റിയവരുമായി വിദൂരദിക്കുകളില്‍നിന്ന് അവര്‍ എന്‍െറ അടുത്തുവന്നിരിക്കുന്നു. എന്‍െറ കാരുണ്യം മാത്രം കാംക്ഷിച്ചുകൊണ്ട്. എന്‍െറ ശിക്ഷ അവര്‍ കണ്ടിട്ടില്ല.’

അറഫാ ദിനത്തേക്കാള്‍ കൂടുതല്‍ നരകവിമോചിതരുണ്ടാകുന്ന മറ്റൊരു ദിവസവും കാണപ്പെടുകയില്ലെന്നും നബി അരുളിയിട്ടുണ്ട്. എല്ലാം ഏറ്റുപറഞ്ഞ് പാപമോചനം തേടുന്ന പ്രാര്‍ഥനയാണ് അറഫയില്‍ തീര്‍ഥാടകര്‍ നടത്തുന്നത്. മുസ്ലിം സമൂഹം ദേശീയ-അന്തര്‍ദേശീയതലങ്ങളില്‍ നേരിട്ടുകൊണ്ടിരിക്കുന്ന പ്രതിസന്ധികളില്‍നിന്ന് മോചനം അഭ്യര്‍ഥിച്ചും നാഥനോട് കേഴുന്ന ഇടമാണിത്. സകലവിധ പ്രയാസങ്ങളും സഹിച്ച് അറഫയില്‍ സമ്മേളിക്കുന്ന ഹജ്ജ് തീര്‍ഥാടകരോട് ഐക്യദാര്‍ഢ്യം പ്രകടിപ്പിച്ച് നോമ്പനുഷ്ഠിക്കുന്നത് മുസ്ലിംകള്‍ക്ക് പ്രതിഫലാര്‍ഹമായ കര്‍മമാണ്.

ഹാജിമാര്‍ മിനയിലേക്ക്; ഹജ്ജിന് ഔദ്യോഗിക തുടക്കം

October 13, 2013 11:39 am

ഹജ്ജ് തീര്‍ത്ഥാടനത്തിനായി വിശുദ്ധ ഭൂമിയിലെത്തിയ ഹാജിമാര്‍ മിനയിലേക്കുള്ള യാത്ര ആരംഭിച്ചതോടെ ഈ വര്‍ഷത്തെ ഹജ്ജിന് ഔദ്യോഗിക തുടക്കമായി. ഇന്ന് മക്കയില്‍ പ്രഭാത നിസ്കാരം നിര്‍വഹിച്ചതിനു ശേഷമാണ് ലോകത്തിന്‍റെ വിവിധ ഭാഗങ്ങളില്‍ നിന്നുള്ള 1.3 മില്യണ്‍ തീര്‍ത്ഥാടകര്‍ എട്ടു കിലോമീറ്റര്‍ അകലെയുള്ള മിനായിലേക്ക് പുറപ്പെട്ടിരിക്കുന്നത്.

മിനയില്‍ എയര്‍ കണ്ടീഷന്‍ ചെയ്ത തമ്പുകള്‍ തീര്‍ത്ഥാടകരെ കാത്തിരിക്കുകയാണ്. മിനയിലെ ഒരു ദിവസത്തെ താമസത്തിനു ശേഷം ഹജ്ജിന്‍റെ പ്രധാന ഇനമായ അറഫാ സംഗമത്തിനായി ഹാജിമാര്‍ അറഫയിലേക്ക് പുറപ്പെടും. മിനയില്‍ നിന്നും 14 കിലോമീറ്റര്‍ അകലെയാണ് അറഫ.

ഹജ്ജിനോടനുബന്ധിച്ചുള്ള സുരക്ഷയും സൌകര്യവും ഉറപ്പുവരുത്താനായി സൌദി ഹജ്ജ് മന്ത്രാലയത്തിനു കീഴിലും സന്നദ്ധ സംഘടനകള്‍ക്കു കീഴിലും സജ്ജീകരണങ്ങള്‍ തകൃതിയായി നടക്കുന്നുണ്ട്.

മുസ്‌ലിം വ്യക്തിനിയമ സംരക്ഷണം; പോരാട്ട കഥകള്

സുപ്രീംകോടതി വിധി മറികടക്കാന്‍വേണ്ടി, 1986 മെയ് 6ാം തീയതി രാജീവ്ഗാന്ധി സര്‍ക്കാര്‍ പാര്‍ലമെന്റില്‍ മുസ്‌ലിം വുമന്‍ (പ്രൊട്ടക്ഷന്‍ ഓഫ് റൈറ്റ്‌സ് ഓണ്‍ ഡൈവോഴ്‌സ്) ആക്ട്, 1986 എന്ന പേരില്‍ ഒരു നിയമം പാസാക്കുകയും വിവാഹ മോചിതകള്‍ക്കുള്ള ജീവനാംശം ശരീഅത്ത് നിയമത്തിന് അനുസൃതമാക്കുകയും ചെയ്തു. ഇന്ത്യയിലെ മുസ്‌ലിംകളെ സംബന്ധിച്ചേടത്തോളം ഒരു ചരിത്ര വിജയമായിരുന്നു അത്. എന്നാല്‍ ഖേദകരമെന്ന് പറയട്ടെ ഈ നിയമത്തിന്റെ സാധുതക്കെതിരെ പലപ്പോഴും വെല്ലുവിളികള്‍ ഉയര്‍ന്നുകൊണ്ടിരുന്നു. സുപ്രീംകോടതിയില്‍ അതിനെ ചോദ്യംചെയ്തുകൊണ്ട് ധാരാളം റിട്ടുകള്‍ ഫയല്‍ ചെയ്യപ്പെട്ടു. കൂടാതെ, ചില ഹൈക്കോടതികളില്‍നിന്ന് അതിനെതിരെ വിധികളും വന്നു. ഈ പ്രശ്‌നം പരിഹരിക്കാന്‍ മുസ്‌ലിം പേഴ്‌സണല്‍ ലോ ബോര്‍ഡ് നിയമ വിദഗ്ദ്ധരുടെ ഒരു കമ്മിറ്റി രൂപീകരിച്ച് പ്രവര്‍ത്തിച്ചുകൊണ്ടിരിക്കുന്നു.

ഇസ്‌ലാമിക നിയമങ്ങള്‍ക്ക് വെല്ലുവിളി ഉയര്‍ത്തിയ മറ്റൊരു പ്രശ്‌നം വഖഫ് വരുമാനത്തിനുള്ള ഇന്‍കം ടാക്‌സുമായി ബന്ധപ്പെട്ടതായിരുന്നു. മുന്‍ രാഷ്ട്രപതിയായിരുന്ന ശ്രീ. വെങ്കിട്ടരാമന്‍ കേന്ദ്ര ധനകാര്യ മന്ത്രിയായിരുന്നപ്പോള്‍ ഇന്‍കംടാക്‌സ് നിയമത്തില്‍ ഒരു ഭേദഗതി വരുത്തി. അതുപ്രകാരം, ഇന്‍കംടാക്‌സ് നല്‍കുന്നതില്‍നിന്ന് ഒഴിവാകണമെങ്കില്‍, എല്ലാ വഖഫുകളും അവരുടെ എല്ലാ സ്ഥാവര സ്വത്തുക്കള്‍ വില്‍ക്കുകയും ആ പണം ദേശസാല്‍കൃത ബാങ്കുകളില്‍ അല്ലെങ്കില്‍ സര്‍ക്കാര്‍/അര്‍ദ്ധ സര്‍ക്കാര്‍ സെക്യൂരിറ്റികളിലോ നിക്ഷേപിക്കുകയും ചെയ്യണമായിരുന്നു. ഈ നിയമം നടപ്പാക്കപ്പെട്ടിരുന്നുവെങ്കില്‍, വഖഫുകള്‍ക്ക് അവരുടെ വിവിധയിനം ചെലവുകള്‍ക്ക് ബാങ്കില്‍നിന്നുള്ള പലിശ ഉപയോഗിക്കേണ്ടി വരുമായിരുന്നു.

പലിശ ഇസ്‌ലാമില്‍ നിഷിദ്ധമായതിനാല്‍ അത് വാങ്ങുകയും ഉപയോഗിക്കുകയും ചെയ്യേണ്ടിവരുന്ന അവസ്ഥ ഒഴിവാക്കാന്‍, പ്രസ്തുത നിയമത്തിനെതിരായി മുസ്‌ലിം പേഴ്‌സണല്‍ ലോബോര്‍ഡ് നേതാക്കന്‍മാര്‍ ഗവണ്‍മെന്റില്‍ സമ്മര്‍ദം ചെലുത്തിയതിന്റെ ഫലമായി, പിന്നീട് ശ്രീ. എന്‍.ടി തിവാരി ധനമന്ത്രിയായപ്പോള്‍ വഖഫ് സ്വത്തുക്കളെ ഈ നിയമത്തില്‍നിന്ന് ഒഴിവാക്കുകയുണ്ടായി.

ഓള്‍ ഇന്ത്യാ മുസ്‌ലിം പേഴ്‌സണല്‍ ലോ ബോര്‍ഡിന്റെ അടുത്ത ലക്ഷ്യം, വഖഫ് നിയമങ്ങള്‍ ശരീഅത്ത് അനുസൃതമാക്കുകയും വഖഫ് സ്വത്തുക്കള്‍ സംരക്ഷിക്കുകയും ചെയ്യാനാവശ്യമായ ഭേദഗതികള്‍ വഖഫ് നിയമത്തില്‍ വരുത്തിക്കിട്ടുക എന്നതായിരുന്നു. 1984ല്‍ കേന്ദ്ര സര്‍ക്കാര്‍ രാജ്യസഭയില്‍ ധൃതിപിടിച്ച് ഒരു ബില്ല് അവതരിപ്പിച്ചു. എന്നാല്‍ വഖഫ് സ്വത്തുക്കളുടെ സംരക്ഷണത്തിനുള്ള ഫലപ്രദമായ ഒരു പദ്ധതിയും അതിലില്ലായിരുന്നു. മുസ്‌ലിം പേഴ്‌സണല്‍ ലോ ബോര്‍ഡിന്റെ പ്രതിനിധികള്‍ നിയമമന്ത്രിയുമായി ബന്ധപ്പെട്ട് വിഷയം അദ്ദേഹത്തിന്റെ ശ്രദ്ധയില്‍ പെടുത്തിയെങ്കിലും മൂന്ന് ദിവസത്തിനുശേഷം പൊടുന്നനെ ഈ ബില്ല് പാസാക്കുകയാണുണ്ടായത്. ബോര്‍ഡ്, രാഷ്ട്രപതിയും പ്രധാനമന്ത്രിയുമടക്കമുള്ള അധികൃതരുമായി ബന്ധപ്പെടുകയും മുസ്‌ലിം സംഘടനകളും വ്യക്തികളും ആയിരക്കണക്കില്‍ ടെലിഗ്രാമുകളും കത്തുകളും അയച്ച് പ്രതിഷേധം അറിയിക്കുകയും ചെയ്‌തെങ്കിലും രാഷ്ട്രപതി ബില്ലില്‍ ഒപ്പുവെച്ചു.

ബോര്‍ഡ് ഈ ബില്ല് നടപ്പാക്കുന്നതിനെതിരെ എതിര്‍ക്കുകയും അതില്‍ ഭേദഗതികള്‍ ആവശ്യപ്പെടുകയും അതുമായി ബന്ധപ്പെട്ട നിര്‍ദേശങ്ങള്‍ സമര്‍പ്പിക്കുകയും ചെയ്തു. തുടര്‍ന്ന് 1995ല്‍ പുതിയ വഖഫ് നിയമം പ്രഖ്യാപിക്കപ്പെട്ടു. പൂര്‍ണമായും തൃപ്തികരമാണെന്ന് പറഞ്ഞുകൂടെങ്കിലും, ബോര്‍ഡിന്റെ വിവിധ നിര്‍ദേശങ്ങള്‍ അതില്‍ ഉള്‍പ്പെടുത്തിയിട്ടുണ്ട്. പാര്‍ലമെന്റ് അംഗീകരിച്ച ഈ 'ആക്ടി'ന് കീഴില്‍ വഖഫ് ബോര്‍ഡുകളുടെ പ്രവര്‍ത്തനങ്ങള്‍ നിരീക്ഷിക്കുന്നതിന് ഒരു ജോയിന്റ് പാര്‍ലമെന്ററി കമ്മിറ്റി രൂപീകരിച്ചിട്ടുണ്ട്. അവര്‍ ചില വിഷയങ്ങളില്‍ മുസ്‌ലിം പേഴ്‌സണല്‍ ലോ ബോര്‍ഡിന്റെ അഭിപ്രായം ആരാഞ്ഞിട്ടുണ്ട്. കൂടുതല്‍ സമഗ്രവും കുറ്റമറ്റതുമായ ഒരു വഖഫ് നിയമം സമീപ ഭാവിയില്‍ ആവിഷ്‌കരിക്കപ്പെടുമെന്ന് പ്രതീക്ഷിക്കാം.

മുസ്‌ലിം വ്യക്തി നിയമത്തിന്റെയും ശരീഅത്തിന്റെയും സംരക്ഷണത്തിനുവേണ്ടി ഇന്ത്യയിലെ മുസ്‌ലിംകള്‍ കാലാകാലം നടത്തിയ വിജയകരമായ പരിശ്രമങ്ങളുടെ ഒരു ഹ്രസ്വ വിവരണമാണ് മേലെ നല്‍കിയത്. അതില്‍നിന്ന് ഒരു കാര്യം വ്യക്തമാകും. ഭരണഘടനാദത്തമായ മുസ്‌ലിം വ്യക്തി നിയമത്തിന്റെ സംരക്ഷണത്തിനുവേണ്ടി നിയമ നടപടികള്‍ സ്വീകരിക്കുന്നതോ, കോടതികളെ സമീപിക്കുന്നതോ നിയമ നിര്‍മ്മാണമോ നിയമ ഭേദഗതിയോ ആവശ്യപ്പെടുന്നതോ ഒരു മഹാ അപരാധമോ നിയമ ലംഘനമോ അല്ല. അങ്ങനെയാണെങ്കില്‍ മുസ്‌ലിംകള്‍ അങ്ങനെ ചെയ്യുമായിരുന്നില്ല. ചെയ്താല്‍തന്നെ വിജയിക്കുമായിരുന്നില്ല.

മാറിവരുന്ന സാഹചര്യങ്ങളിലേക്കും ആവശ്യങ്ങളുമനുസരിച്ച് കേന്ദ്ര സര്‍ക്കാറും സംസ്ഥാന സര്‍ക്കാറുകളും എത്രയോ നിയമങ്ങളും ഉത്തരവുകളും റദ്ദാക്കുകയോ മാറ്റുകയോ ചെയ്തിട്ടുണ്ട്. കോടതികളും അവയുടെ വിധികളും ഉത്തരവുകളും മാറ്റിയിട്ടുണ്ട്. ഇന്ത്യന്‍ ഭരണഘടനയില്‍പോലും എത്ര തവണ ഭേദഗതി വരുത്തിയിട്ടുണ്ട്. എന്നിരിക്കെ, രാജ്യത്തെ ഒരു പ്രബല ന്യൂനപക്ഷ വിഭാഗമായ മുസ്‌ലിംകള്‍ തങ്ങളുടെ വ്യക്തിനിയമങ്ങളെ പ്രതികൂലമായി ബാധിക്കുന്ന നിയമന നിര്‍മ്മാണങ്ങളെയും കോടതി വിധികളെയും സര്‍ക്കാര്‍ ഉത്തരവുകളെയും മറ്റും മാറ്റണമെന്ന് ആവശ്യപ്പെടുന്നതില്‍ എന്താണ് തെറ്റ്?

(ഡോ. ഇ.കെ അഹമ്മദ്കുട്ടിയുടെ ലേഖനത്തിലെ ചില വിവരങ്ങള്‍ക്ക് ഓള്‍ ഇന്ത്യാ മുസ്‌ലിം പേഴ്‌സണല്‍ ലോ ബോര്‍ഡ്, ന്യൂഡല്‍ഹി പ്രസിദ്ധീകരിച്ച 'ദി ഇഷ്യൂ ഓഫ് മുസ്‌ലിം പേഴ്‌സണല്‍ ലോ ഇന്‍ഡ്രൊഡക്ഷന്‍ ആന്റ് അനാലിസിസ്, ഓള്‍ ഇന്ത്യാ മുസ്‌ലിം ലോ ബോര്‍ഡ് എച്ചീവ്‌മെന്റ്‌സ് ആന്റ് ആക്ടിവിറ്റീസ്, ഓള്‍ ഇന്ത്യാ മുസ്‌ലിം പേഴ്‌സണല്‍ ലോ ബോര്‍ഡ് - ഫിസിയോളജി, മെത്തലോള്‍ജി ആന്റ് എച്ചീവ്‌മെന്റ്‌സ്, ഓള്‍ ഇന്ത്യാ മുസ്‌ലിം പേഴ്‌സണല്‍ ലോ ബോര്‍ഡ് - ഒരു ലഘു പരിചയം (മലയാള പരിഭാഷ) എന്നീ കൃതികളോട് കടപ്പാട്-ചന്ദ്രിക.)